Gant red an dour

Klañv c’hoazh !

2009-02-24T17:56:00.003+01:00

Klañv on abaoe ur mizvezh. Tanijenn ar sinus ’m eus, droug sinus hervez ar geriadur. Torr-penn eo. Kavout a ra din evel ma vefe leuniet ma fenn gant stoub pe gant koton. Diaes eo labourat e-giz-se !

Bet on e ti ar medisin ur wech, hag ur wech all goude div sizhunvezh. Bewech en deus roet din louzoù da gemer. Evit ar wech-mañ eo ret din kemer un antibiotik kreñv-tre. Lennet ’m eus an notennig a ya gant ar voest. Efedoù da c’hoarvezout : droug stir (da laret eo “ tendinite ”), sav-kalon, foerell, h. a. !

Kalon vat, ma faotr ! Emaout o vont da barañ… emichañs !

En tren

2009-02-20T09:43:00.004+01:00

En-dro d’am blog ! Pelloc’h eget ur bloavezh n’em eus ket skrivet warnañ. Adkavout a ran anezhañ gant doujañs un tammig. Ne oan ket evit lakaat anezhañ didu, dilezet, emzivat. Skiant am boa da zilezel ar yezh war un dro gantañ. N’eus ket anv !

Tremen a ran ur sizhunvezh e Belgia. Bemdez ez on gant an tren eus Rixensart da Louvain-an-Nevez evit ar beure, hag en-dro da Rixensart e fin an devezh. Labourat a ran e levraoueg ar skol-veur. Ur vuhez kompez, enoeüs zoken. Plijout a ra din memestra ar vuhez louet-mañ, ha n’eus ket traoù dibar enni. Traoùigoù fentus a zeu da vezañ a-bouez : ur plac’h o vousc’hoarzhin en ur bignat d’ar c’hombod (hag uhel e zerezioù !), ur paotr o venel kousket a-benn pemp munutenn goude ma eo loc’het an tren. War ribl an hent eo strewet gouleier-tremen kozh kouezhet abaoe meur a vloaz. N’eo ket brav, sur a-walc’h. Em soñj avat int henvel ouzh ar c’hrizennoù war dremm un den kozh. Kaer a gavan anezho.

Ar c’hleñved Alzheimer

2007-10-24T17:54:00.000+02:00

Ur pennad ’m eus kavet er gazetenn “ Le Monde 2 ” diwar-benn ar c’hleñved Alzheimer, gant un atersadenn fromus eus ur gleñvouriez, Claude hec’h anv, en deus savet ur blog evit kontañ he buhez.

Setu komzoù tennet eus hec’h atersadenn…

En em santout a ran evel un den “ skignet &rdquo, a-stlabez.

Mont a ra kuit ma spered troc’h-didroc’h.

N’on ket evit ober lamaduroù. Ne ran ket nemet sammadurioù. Marteze rak ne fell ket din ken e vo dilamet un dra bennak diganin. Bevañ a ran evel ma vijen en ur wezenn e vije torret he skourroù a-vuzul ma’z an a-raok enni.

Ha d’he div verc’h e lavar :

Marteze e vo un deiz ma n’anavezin ket ken ac’hanoc’h. Un dra zo sur avat : en em santout a rin brav ganeoc’h bepred. Chom a ray ar garantez, ar garantez rik-ha-rik. Neuze, perak bezañ trist ? Ma reot strivioù evit chom joaius ha laouen, daoust ar glac’har, e vo mat deomp a-gevret.

Gounit hon hêrezh

2007-08-24T14:47:00.000+02:00

“Was du ererbt von deinen Vätern hast,
erwirb es, um es zu besitzen.”

Johann Wolfgang von Goethe, Faust kentañ.

“An hêrezh ho peus degemeret diouzh ho tud,
gounezit anezhi evit he ferc’hennañ.”

Bamet on bet gant ar frazenn-mañ en ur lenn anezhi war moger un ti e Lusern e bro Suis. Staget am boa diouzhtu al lavar gant Goethe da stad ar yezh e Breizh. Petra o deus graet ar Vretoned eus o yezh, da lavaret eo eus o hêrezh ?

Ma familh a zo eus Kistreberzh moarvat. Met ganet on bet e-kichen Pariz, n’on ket ur Breizhad gwir neuze. Koulskoude aet on da vezañ unan en ur zeskiñ ar yezh. Adkavet am eus ma hêrezh gant ma strivoù. N’anavezan ket mat nag ar vro, nag he giz, nag he sevenadur, nag hec’h hengounioù. N’on ket evit kontañ eñvorioù eus an amzer tremenet e Breizh. Klasket em eus avat piaouañ un tamm eus Breizh war-bouez ar yezh.

Souezhet on bet da vat pa em eus dizoloet Bretoned oc’h ober goap ouzhin rak deskiñ a ran o yezh ha n’anavezont ket anezhi o-unan. Da betra e servijo dit ? Un dra e maez ar c’hiz eo ar yezh. Un dra kozh ha ret eo ankounac’haat anezhi.

O hêrezh eo ar yezh koulskoude. Ne vo ket kollet gant an holl. Gounit a raimp anezhi evit he ferc’hennañ.

Skuizhnez ebet

2007-07-25T14:30:00.000+02:00

Lennet en ul levr gant Exbrayat (!) : ne yelo ket ar mor da vezañ skuizh biken…

N’eo ket diwir ! En em c’houlenn a ran : an abeg an hini eo ma vez santet ur voem o sellout ouzh ar mor ? Setu an nerzh diaoz, setu ar youl glan, ha n’anavez skuizhnez ebet. Pep den a blij dezhañ arvest ar mor o ruilhañ e wag a-stok ouzh an aod. Nerzh a vo kavet ennañ, ha pasianted ar garantez.

C’hoarzhin

2007-07-09T12:38:00.000+02:00

Stlepel a ra e c’hoarzh
dreist keleier ar walleur,
ur gontell lemm hag a droc’h
un egor disuj evit ar vuhez.
Laouenn hag hegarat e zremm,
yac’h-pesk ha bev e galon.

Erc’h war an enezeg

2007-07-02T16:59:00.000+02:00

Adkavout a ran hiziv ar gwerzioù-mañ gant Maodez Glanndour am boa lennet mizioù zo. Brudet kenañ int hep mare abalamour d’o c’hoantiz.

Hag-eñ eo diskennet en noz
Elerc’h gwenn-kann an hanternoz ?
Hag e kouskont er mor morzet,
Pleget o fenn dindan o fluñv.

N’eo ket elerc’h. An erc’h
A zo kouezhet askellek en enezeg.
N’eus en aber ’met reier
A huñvre kuñv dindan o fluñv.

Piv a c’hallfe treiñ ar gwerzioù ha ne drubardfe o aozer ? Un abeg c’hoazh evit deskiñ ar yezh…

Óneri mihi sum

2007-05-30T11:57:00.000+02:00

Nunc autem quóniam quem tu imples, súblevas eum, quóniam tui plenus non sum, óneri mihi sum. [Neuze an hini a leugnit a vez savet ganeoc’h dre ma vezan ur garg evidon-me pa ne vezan ket leuniet ganeoc’h.]

Lennet em eus ar frazenn gevrinus-mañ gant sant Augustin hiziv. Ur paradoks eo : pa vez goullo an ene e vez ponner, pa vez leun a Zoue e vez skañv. Ar mab-den a vez flastret gant pouez e vuhez pa vez goullo eus bezañs Doue e ene. Gant gras Doue avat e vez kresket dezhañ diveskell, diveskell al levenez, diveskell ar Spered Glan.

Bennigañ ar vaouez

2007-05-12T16:49:00.000+02:00

Hiziv eo bet kontet din ar pezh a vez graet e Bro Sri Lanka d’ar merc’hed pa vezont deuet d’o c’hrennoad. Evit mizioù kentañ ar plac’h e vez lidet ur gouel dreist ha dibar : gwisket e vez ar plac’h evel ur briñsez, profoù a vez roet dezhi. Ne vez ket kuzhet hec’h afer, er c’hontrol e vez embannet d’ar gerent ha d’an amezeien… Setu ur vaouez nevez o tont en hon touez !
Pegen brav eo ar c’hustum-se ! Lakaet e vez d’ar merc’hed kompren bri hag enor o stad : n’eus ket mezh ebet gantañ !
Ur paotr on, n’ouzon ket penaos e vez santet gant ar merc’hed o donedigezh d’an oad. Me a gav din koulskoude n’eo ket aes-tre dezho en hor broioù pa vez kuzhet d’an holl ur prantad ken a-bouez evito. A-dra-sur e vez aesoc’h da briñsezed eus Sri Lanka, gwisket brav ha benniget gant an holl.

Paotr an tour-tan

2007-04-22T17:22:00.000+02:00

A-daol-trumm eo deut anat din : paotr an tour-tan eo an Aotrou Doue hervez ma kont ar salm 92.

An Aotrou a ren ! Gwisket eo a splannder,
gwisket a nerzh eo an Aotrou,
gourizet en deus e zargreiz gant galloud.

Diazezet hoc’h eus an hollved, ne vrallo ket !
Ho tron hoc’h eus startaet a holl viskoazh,
a-vepred ez oc’h-c’hwi o Doue !

Ar stêrioù bras a sav, Aotrou,
ar stêrioù bras a sav o mouezhioù,
ar stêrioù bras a sav en ur grozal.

Kreñvoc’h eget mouzeh an doureier bras,
galloudusoc’h eget tarzhioù ar mor
eo galloudus an Aotrou en neñvoù.

Sur-meurbet ha divrall en ho tivizadurioù !
Ar santelezh, Aotrou, a zo dleet d’ho ti
e padelezh an amzerioù.

Sklaer evel lagad an naer eo ar skeudenn : evel ma vije an Aotrou Doue paotr an tour-tan uhelañ war an douar, o troniñ dreist ar bed a-bezh, kreñv a-enep an nerzhioù gourdrouzus a dag ac’hanomp bemdez. An trec’h a vo gantañ, sur-mat. Diazezet en deus ar bed na vrallo biken. Arabat spontañ neuze : ma vez an Aotrou ganeomp, piv a vije a-enep deomp ?

C’hoantoù an oad-gour

2007-04-17T21:03:00.000+02:00

Karget omp gant c’hoantoù n’o deus ket kavet o gwalc’h. Setu orin poan-spered an dud lies-a-wech… C’hoantegezh an den n’anavez harz ebet. Re greñv eo ha ne vo distavet biken. An den a zo bras ha ledan e galon, n’eus ket moaien d’he leuniañ. Emañ tristidigezh an ene hag hiraezh dizeur ar spered o chom el lec’h dilaouen-mañ ma klemmich hor c’halon. Petra a zo d’ober neuze ? Huanadiñ a-hed an devezh ? Keinal eus tarzh-an-deiz betek eurioù digousk an nozvezh ? Chom grignous o trueziñ outañ e-unañ ? Gwelloc’h e vefe klask risklañ e vuhez en ur zegemer e c’hoantoù, en ur asantiñ outo. Hent al levenez a dremen amañ. Kavet e vo al levenez en ur zilenn e c’hoantoù, ha n’eo ket en ur chom a-grap ouzh o seveniñ. Karet e vo ar gortoz muioc’h eget ar pezh a vez gortozet. Karet e vo ar c’hoant muioc’h eget ar pezh a vez spurmantet. Setu marteze furnez an oad-gour : gouzout tu ar gortoz, tu ar basianted, staget d’al levenez a zeu…

Gwez o tañsal

2007-04-09T21:46:00.000+02:00

Dec’h e oa brav-kenañ an amzer. Bet oan o vale en ur c’hoad e-kichen Roazhon evit fin an devezh. Ne oa ket kalz a dud d’an eur-mañ. Sioul e oa ar c’hoad. Ne gleved ket nemet kanaouennoù al laboused. Glas-mik oa an oabl, hep tarch ebet. O sellout ouzh bleñchenn ar gwez e oan, savet uhel dreist kefioù divuzul. Un aezhenn skañv a heje anezho. Fiñval a raent goustadik… Chomet e oan ur vunutenn pe ziv, sebezet gant o dañs. Sioulder ha peoc’h a leunie ma ene.
Ar gwez a zañs gant o fennoù tra ma tañs an den gant e dreid… Ret e vefe dimp deskiñ digant ar gwez un doare aereloc’h da vevañ !

Ur bedenn

2007-03-20T11:12:00.000+01:00

Пока Земля еще вертится, пока еще ярок свет,
Господи, дай же ты каждому, чего у него нет:
мудрому дай голову, трусливому дай коня,
дай счастливому денег… И не забудь про меня.

Пока Земля еще вертится — Господи, твоя власть!—
дай рвущемуся к власти навластвоваться всласть,
дай передышку щедрому, хоть до исхода дня.
Каину дай раскаяние… И не забудь про меня.

Я знаю: ты все умеешь, я верую в мудрость твою,
как верит солдат убитый, что он проживает в раю,
как верит каждое ухо тихим речам твоим,
как веруем и мы сами, не ведая, что творим!

Господи мой Боже, зеленоглазый мой!
Пока Земля еще вертится, и это ей странно самой,
пока ей еще хватает времени и огня,
дай же ты всем понемногу… И не забудь про меня.

Молитва, 1989, Boulat Okoudjava, 1924-1997.

E-pad e tro ar bed c’hoazh, e-pad e lugern ar gouloù c’hoazh,
Aotrou, roit da bep hini kement a vank dezhañ :
d’an hini fur roit e benn, d’an hini aonik e gezeg,
d’an hini eürus gwenneien… ha n’am ankouait ket !

E-pad e tro ar bed c’hoazh — Aotrou, ho kalloud !
Roit d’an hini a zo o kregiñ er galloud an trec’h war ar galloud,
d’an hini brokus un ehan betek tarzh an deiz da nebeutañ,
da Gaïn roit ar morc’hedoù… ha n’am ankouait ket !

Gouzout a ran : pep tra a zo en ho talc’h, krediñ a ran en ho furnez
evel ma kred ar soudard lazhet e treuzvevo er baradoz,
evel ma kred pep divskouarn en ho komzoù c’hwek,
evel ma kredomp hon-unan ha n’anavezomp ket hon ober.

Aotrou ma Doue, gwer ho taoulagad evidon,
e-pad e tro ar bed c’hoazh, ha pegen iskis eo evitañ e-unan !
ha trawalc’h eo an amzer hag an tan evitañ,
roit da bep hini un tammig… ha n’am ankouait ket !

Yaouankiz

2007-03-19T10:58:00.000+01:00

(Diwar ur werz gant Li Bai.)

E kreiz al lenn bihan
ez eus un hañvdi eus porselen
gwer ha gwenn.

Evel kein un tiger
e kromm ur pont eus mein-jad
war-zu an hañvdi.

En o c’hoazez er gêr, mignoned
gwisket brav, oc’h evañ hag o varvailhat.
Meur a hini o skrivañ gwerzioù.

O milginoù seiz troñset a-dreñv,
o zogoù gwintet laouen
betek ar chouk.

War c’horre sioul al lenn bihan
e vez gwelet marvailhoù
e melezour an dour.

Heñvel ouzh ul loargresk
e lugern ar pont, bolz war an tu gin.
Mignoned wisket brav oc’h evañ hag o varvailhat.

An holl en o sav war o fenn
en hañvdi eus porselen
gwer ha gwenn.

Dallidigezh hor buhez

2007-03-18T19:08:00.000+01:00

Bezañ ur c’hristen n’eo ket aes. Gouzout a reomp mat se ! War hent hor buhez hon eus en em zizoloet e hentoù-dall. A wechoù e kave deomp e c’hallfemp displegañ ar feiz kristen hervez ur skeudenn ne oa ket dereat eviti avat.
Hon troioù-kaer a feiz hon eus pep hini, pe, kentoc’h, hor gwalldroioù. Bez’ ez eus deizioù ma sav ar gouloù o tiskuliañ hon hent-dall, o flatrañ ar gitaj hor boa gwisket evit hañvalout war ur c’hristen gwir.
Sur-mat ho peus graet an arnodenn-mañ : goude komzoù ur mignon, war lerc’h un darvoud bennak en hor buhez, e-pad un diviz, en ur lenn ar Bibl, en ur lidañ ur sakramant, pe simpl-ha-simpl e-pad ar bedenn, e vez dizoloet un darn eus hor buhez evel un dra flak ha bresk war un dro. Kavout a rae din e ouien pep tra diwar benn ar garantez ma’z on krog da zizoleiñ penaos e c’hallfe stummañ ma buhez. Kavout a rae din em boa dibabet an doare dereat da vont gant an arc’hant ma komprenan pegen bouzar on bet ouzh kalvadennoù ur mignon din. Kavout a rae din bezañ war lerc’h ar C’hrist ma oan o c’hengervel anezhañ.
Degouezhout a ra un dra vadinellus, un diskuliadur. Dizoleiñ a ran ma hent-dall. Hag un hent nevez-flamm a ya war wel d’am dallidigezh.
Evel-se e ya an den a feiz war-raok, eus e zallidigezh d’un diskuliadur. Setu penaos e tarev ar feiz, penaos e kresk ar vuhez speredel. An hent-mañ zo ret d’ar feiz a vez dalc’hmat keidet ha diazezet dreuzañ.

Distro eus Dubai

2007-02-18T17:18:00.000+01:00

Aet on e Dubai evit ur sizhunvezh, pedet gant mignoned din hag a labouront eno. Gwelet ho peus fotoioù eus savadurioù uhel uhel e Dubai ? Badinellus int. Hag ar c’hreizennoù kenwerzh ? Unan eus ar re brasañ a endalc’h ur savlec’h evit skiañ, gant erc’h ardaouel, redhentoù, ur fundagor… Ur boem !… Ur boem ? N’eo ket sur a-walc’h. Diaezet oan bet o welout an holl varvailhoù-mañ. Ugent vloaz zo on bet e bro Arabia evit ma labour (ijinour douaroniour e oan a vicher). Dizoloet am boa ur bed all, pinvidik-mor, tomm abominapl, ne oa ket plijus-tre bevañ ennañ. Souezhus e oa : roud ebet eus sevenadur ar vro, nemet un dra : d’ar Gwener (devezh dilabour ar sizhun) e weled teltennoù bras savet war ribl ar gourhentoù hag a oa ar familhoù o tremen an devezh enno, evel ma vevent kant vloaz zo. Un diempradur par am eus dizoloet e Dubai. Pinvidigezh bepred ha dre-holl, sevenadur ebet avat. N’eus ket na mirdioù na testoù an amzer tremenet. Ur vro ziliammet eus an istor, hep gwrizioù.

An dourgi

2007-01-31T17:37:00.000+01:00

An dourgi eo ma zotem skout. Setu perak e plij din al loen-se ! Dourgon zo hag a vev e-barzh ar mor, re all a vev e-barzh ar stêrioù. Barrek-kenañ int war an neuñviñ. Gwelet em eus unan o neuñviñ war e gein en ur zebriñ un istrenn. Lakaet en doa ur maen plaen war e gof hag an istrenn warnañ. En ur flodañ e oa o stekiñ ouzh an istrenn gant un eil maen evit terriñ anezhi. Pebezh ijin ! Ha pegen ampart e oa al loenig-mañ ! Ma vez muzuliet ar speredegezh dre ar varregezh da implij binvioù, e vez neuze an dourgi ul loen gwall speredek hag a oar implij daou venveg a-stroll evit digeriñ un istrenn. Ar paour-kaezh loen en deus ur feur brav o sachañ evezh ar chaseourien siwazh… N’eus ket ken kalz a zourgon en hor gwazhioù evit an deizioù.

Skiant ar mad

2007-01-03T17:54:00.000+01:00

Ur paotr en e garr a c’houlenn digant ur c’houer : “Pelec’h emañ an hent da Wengamp ?” An hini all da respont : “En ho plas, n’ajen ket eus amañ !”
Fentus ha souezhus eo ar respont-mañ. Heñvel eo ouzh hon doare da leviañ buhez ar re all avat !
Alies e vez graet evel-se gant an dud : e-lec’h skoazellañ anezho ne reomp ket nemet disklêriañ dezho penaos (pe biv) e vefe ret dezho bezañ. “Gwelloc’h e vefe dit bezañ an den-mañ-den ! E-giz-se e vefe tu d’ober un dra vat ac’hanout !”
Da gentañ ret dimp degemer ar re all hervez ma’z int. Da eil klask ganto un hent aes evit o buhez. Ha mat pell zo.

Goañv

2006-12-25T18:54:00.000+01:00

Evel ma kemmesk ar mor gant ul latar stank en deus gwisket an douar al libistr sklas a ya a-sil e-barzh pep hent-kev, pep toullenn ha pep erv. Diskolpañ a ra an douar lizennek, gwak ha bresk war un dro. Mirout a ra kement hini a vac’h warnañ, den pe loen, da genseurt e zienez. Trouz ebet, liv ebet war ar parkeier, bezioù bras ha digor o c’hortoz ma lonkint o freizhoù. N’eus nemet ur yenijenn louet ha luget o skornañ ar vro. Strivañ a ra ul labous du da nijal dreist ar golo eus poan stonket ouzh gorre ar maezioù. Un darnij ponner hag izel, prouenn splann eus nerzh ar reuz hag eus gwander ar vuhez. Pegen yen eo din em c’halon !

Droch eo an dud

2006-11-04T09:56:00.000+01:00

Setu ar pezh ’m eus lennet war lec’hienn AFP diwar-benn harzadenn an Itron Lelièvre, mamm yaouank David, he deus lakaet anezhañ marv en ul lenn e-kichen Redon :

Ar vamm yaouank […] zo deuet berr-ha-berr da he chomlec’h gant an archerien. Aet eo da c’houde dioutañ dindan huadoù un ugent den oadet bennak, gant bugale en o zouez, bodet dirak ar savadur.

Gant ar vezh ! Ne gomprenan ket an huadoù-se… Ne zifennan ket muntr ur babig, evel-just. Me a gav din, koulskoude, n’eo ket ar vamm-se un euzhden hag a vefe ret diskouez anezhañ en ur gunujañ warnañ. N’ouzon ket ar pezh zo c’hoarvezet etre ar vamm hag he babig. N’anavezan ket buhez ar vaouez-se. Un dra zo sur koulskoude : un den eo, un den eveldon, un den eveldoc’h. Klañv he spered, marteze, sur a-walc’h. Met un den a chom da vezañ. Ne vo ket kollet an doujañs biken he deus urzh dezhañ.

Hoalañ ec’h ene

2006-10-08T08:00:00.000+02:00

En un enezenn e-kichen Java, er c’hevandir aziat, ez eus ur meuriad diorbid ha paour gant kustumoù dreistordinal. Bemdez evit tarzh-an-deiz e ya paotred ha merc’hed da gutuilh bleunioù hollgaer. Gwiskañ a reont anezho evel bravigoù. Fellout a ra dezho hoalañ oc’h ene gant ar bleunioù-se evit ma chomont gant o c’horfoù.
N’eo ket fall ar boaz-se ! Me a gav din, e vefe un dra d’ober du-mañ ivez. Sur a-walc’h, n’eus ket aon ebet ganimp da goll hon ene. Met goût a reomp mat pegen ziaes eo evit meur a hini d’en em garout. En ur gemer an amzer evit en em fichañ gant traoù brav e teskomp pegen brav hag hegarat omp-ni.
Un doare da hoalañ ma-unañ ha d’adsevel ar peoc’h ganin-me. Un doare da zizoleiñ levenez ar vuhez, priz pep devezh… Ur furnez da vat, n’eo ket ?

Krouet evit ar wirionez

2006-10-07T15:22:00.000+02:00

Dec’h em boa selaouet ur brezegenn gant Timothy Radcliffe evit digoridigezh ar bloavezh e UCO e Angers. Lâret en doa un dra am boa selaouet c’hoazh, met evit ar wech-mañ, n’ouzon ket perak, skoet on bet ganti. Setu ar pezh en doa lâret :

Ar pesk a zo anezhañ evit neuial. Al labous a zo anezhañ evit nijal. An den a zo anezhañ evit klask ar wirionez.

Ur re bennak er sal a oa o c’hortoz ur ger all, d’am soñj. Meur a hini a lavarfe ez eo an den anezhañ evit ar garantez, hep mar.
Evit ar wirionez omp bet krouet. Ret eo lezel al lavar-mañ troc’hañ e hent dre hor penn hag hor c’halon. Ar wirionez, da lavarout eo al logos, ur varregezh evit prederiañ, evit pouezañ an tu pe du… Tra difer an den eo ar c’hlask-mañ. Ma vefe gwir lavar Timothy, petra a cheñchfe em buhez ?

Minos ha Nikos

2006-09-05T18:18:00.000+02:00

Lennet ’m eus ur c’heñveriadur gwall zedennus etre mojenn ar Minotaur hag an abadenn vrudet-kenañ “Star Academy” er skinwel. Pa vez komzet eus ur pemzek den bennak, merc’hed ha paotred a-gevret, bodet er memes lec’h prennet, a vo amprouet gant meur a arnodenn griz, kaset kuit an eil goude egile, betek ma ne chomo nemet ur gounezer, ur c’hloar zivent gantañ, peseurt soñj a zeu deoc’h ?
Gwechall e oa ur roue, Minos e anv, en doa aloubet kêr Aten ha goulennet groñs e vefe kaset seizh paotr ha seizh plac’h da Enez-Greta bep nav bloaz. Ur roñfl den-tarv, Minotaur e anv, a c’hortoze an dud yaouank en ur milendall evit plaouiañ anezho. Gouzout a rit an istor : Teze an hini eo a oa aet ar maout […!] gantañ.
Iskis eo ar c’heñveriadur, n’eo ket ? Oc’h en em c’houlenn emaon : ret e vefe kompren eo Nikos (displeger an abadenn) ur Minos nevez, da lavarout eo un enebour kriz, ur mac’homer a-enep ar yaouankiz ?
Pe n’eo ket Nikos an enebour, met reizhiad ar skinwel kentoc’h…

Livioù

2006-09-03T16:42:00.000+02:00

En eil levriad an antologiezh gant Frañsez Favereau anvet Lennegezh ar brezhoneg en XXvet kantved (Montroulez : Skol Vreizh, 2003) e vez kavet un destenn verr gant Maodez Glanndour (anv-pluenn an aotrou Loeiz ar Floc’h), “Liv” hec’h anv, p. 477 :

Livioù, livioù, dreist pep tra livioù.
Amañ n’eo ket danvezek, kalet, troc’het resis al livioù. Amañ int skañv, fiñvus. Du-hont e veze ganto doare un dra, amañ eo doare an aer.

Amañ, da lavarout eo e Breizh, n’eus nemet meskajoù al livioù. An aer treuzwelus a zo tarchoù eus livioù a bep seurt ennañ.

E bro Italia e oan deuet da heugiñ ouzh ar sklerijenn-se ponner ha mut. Du-hont ne veze nemet daou liv, melen an heol ha glas an neñv, ar re all a oa lazhet. Ken teñval ar siprez hag an derv — du bepred heñvel.

Oc’h en em c’houlenn emaon : penaos e vo degemeret an dud en ur vro ha na c’houzañv ket an arlivioù disheñvel, en ur vro ma vezont lazhet enni ?

Breiz, douar al livioù bepred nevez, sonerez kemmus war vent an deiz hag amzerioù ar bloaz, arlivioù a zaskren hag a nij en aer.
Liv glas, dit da gentañ va meuleudi […]

Gwelloc’h e vefe ganin meuleudi al liv louet a zo ur meskaj eus gwenn ha du, evel-just, eus glas ha melen zoken. Louet eo an oabl hag ar parkeier dindan ar vrumenn, louet eo ar mor en traoñ a ya da dizhout betek fin ar bed. Louet-glas eo daoulagad ar vaouez harpet ouzh he bazh. Ha louet ivez he c’halon marteze, desket ankouaat he lorc’h eus ar vro hag eus ar yezh war he lerc’h.

An deiz o tont

2006-08-24T18:32:00.000+02:00

Setu ar pezh ’m eus ijinet en ur lenn ur varzhoneg gant Anjela Duval.

An deiz o tont, trec’h d’an noz sklas.
An heol o skeiñ ouzh ma stalafioù.
Mont a rin em sav war arbenn d’e bromesaoù.
Bemdez e vez un dasorc’h nevez
ha nerzhoù ha startijenn gantañ
evit derc’hel da vont…

Graet hoc’h eus al loar evit mentañ an amzerioù,
an heol a oar ampoent e guzh :
Degas a rit teñvalijenn ha setu an noz,
ma kantre enni holl loened ar c’hoadeier.
Al leoned yaouank a yud war-lerc’h o freizh
en ur c’houlenn o magadur digant Doue.
An heol a sav, setu m’en em dennont kuit,
evit mont da c’hourvez en o zoulloù.
Ha tro an den eo da vont er-maez evit e labour,
evit e drevell betek ar serr-noz. (Salm 103)

Alfoig

2006-08-21T13:39:00.000+02:00

Maligorn farsus,
dispak da gerniel.
Buoc’hig-Doue,
chom war ma dorn.
Konikl bihan,
na dec’h ket kuit !

Ur spier eus ar Reter
eo ar maligorn.
E enklaskerez
eo ar vuoc’h-Doue.
Adtapout ar c’honikl
a fellfe dezho !

Ne zeuint ket a-benn,
ne lâran ket…

Livioù ar vro

2006-08-17T14:26:00.000+02:00

Louet, glas-louet, melen-louet, damc’hlas… Peseurt liv eo hor bro ? Kement-se mesk-ha-mesk war un dro. C’hoarzhin a ra ar Barizianed ouzh an amzer e Breizh, n’o deus ket komprenet pegen brav eo ar meskad a livioù louet pe c’hlas a zo dizoloet bemdez en un doare nevez. E karantez on gant arlivioù ar gweledvaoù e Breizh : n’eus ket sked trellus ebet o tiverkañ ar munudoù, ret eo d’an daoulagad pourmen gant pasianted a-dro-war-dro evit mont tre da gevrinoù eus ur c’hoad, da vurzhud eus parkeier dindan ar vrumenn pe eus ur pennkêr evit tarzh-an-deiz…

Ar gevnidenn

2006-08-14T18:32:00.000+02:00

Goude ur barrad da greisteiz eo deuet din hiziv un haiku nevez, melkonius a-walc’h.

Goude an arnev e takon ar gevnidenn he gwiad.
Pegoulz e teui en-dro din ?

Perak e teu d’am soñj testennoù trist peurvuiañ ? Ret eo din skrivañ traoù fentusoc’h ! Setu un esa…

’M eus ket sellet ouzh fri ruz ar furlukin,
klevet ’m eus c’hoarzhadenn e galon.

Asompsion Vari

2006-08-13T21:35:00.000+02:00

War ar seblant e kas ar marv Jezuz da get. Marvet eo ouzh ar groaz, en em zeroet en deus d’ar marv, da zismantr hor c’hig, da zismantr hor c’horf. Jezuz zo marvet da vat, ar marv zo bet diskaret warnañ. Gant e zasorc’hidigezh avat en deus trec’het ar marv da viken. Marv eo ar marv.
Tu zo da lavarout : Jezuz zo an den diwezhañ bet marvet da vat, ha Mari zo ar wreg kentañ o chom hep mervel e kevrin he asompsion. Ha ni, tud o tremen er bed-mañ, a varvimp, sur a-walc’h, rak hor c’horf a gouezho evel poultrenn d’ar bez. Met ne varvimp ket da vat, rak ar marv zo Jezuz trec’h warnañ. Mervel a raimp met gallout a reomp gant gwir arvestiñ e kevrin asompsion Vari ouzh dazont un trec’h da viken war ar marv, un trec’h prometet da bep hini e hon touez a-drugarez da zellidoù ar C’hrist. Mervel a raimp met gant an dazont-se en hor c’halon, dazont gloar hor c’horf e-kichen Doue.
Penngelennadur asompsion ar Werc’hez Vari zo ur penngelennadur gwall a-vremañ. Soñjit ’ta d’hor c’hempredidi fichet gant doazhadurioù eus broioù ar reter o c’hargouilhat gant meizad an adenkorfadur. Kendrec’het on ez eo an asompsion un digontamm a-enep an digalon a zo hunvreoù an adenkorfadur o sevel dioutañ.
Perak e hunvreont tud eus broioù ar c’hornaoueg en un adenkorfadur ? Perak ? Soñjal a reont na dalvfe ket hor buhez ar boan da vevañ. Soñjal a reont e vefe hor buhez un draonienn leun a zaeroù hag a boan : “ Emaon o vont da vervel evit en em adenkorfañ evel ur priñs pe ur briñsez, pe evel ur valafenn laouen o gournijellañ. Emaon o vont d’en em adenkorfañ evit ur vuhez all, ha na vo ket ken trist, ken start, ken direizh. Emaon o vont d’en em adenkorfañ evit chom hep bezañ ur gasedourez en ur gourmarc’had, met gwelloc’h ur sterner uhelañ, evit chom hep naetaat ti ar re binvidik, met evit kaout mitizhien em gopr er c’hontrol. Emaon o vont d’en em adenkorfañ peogwir e vefe re zireizh ma ne vefen ket estregedon. Ret eo din en em adenkorfañ peogwir ez on ur bout bennak all, ur bout hegaratoc’h, koantoc’h ha brasoc’h. ”
N’eo ket da vuhez evel-se avat ! Da vuhez zo hegarat, koant ha bras. Ne ra forzh da c’hloar e-kichen an dud, ne ra ket Doue diforc’h etre an dud. Karout a ra kement tud en deus krouet. E-tal an digalon e tiskouez kevrin asompsion ar Werc’hez Vari a zo he gloar dizoloet d’an holl : ar vatezh dilorc’h, ar werc’hez dianav gant istorourien an Henamzer, gwisket en ur vantell eus stered, an tour olifant, Rouanez ar rouanezed, leun a c’hloar Doue. Setu ar pezh a zo Doue o welout en den, setu ar pezh a fell da Zoue reiñ da bep hini.

Lesanvioù

2006-08-10T16:49:00.000+02:00

Lennet war ur blog kavet dre zegouezh :

E bro C’habon ez eus ur skipailh mell-droad o deus e c’hoarierien lesanvioù e-doare “Jezuz benniget” pe “Gloar da Zoue”. Implijout a ra ar gelaouaerien al lesanvioù-se pa zisplegont ar c’hrogadoù er skinwel. A-benn ar fin e vo heñvel an abadenn ouzh un emvod avieladur : “ Emañ Jezuz zo bev o kas ar volotenn da Doue zo madelezhus a dap ur pal ! ”

Fentus eo !

Testamant an derv

2006-08-09T09:27:00.000+02:00

Lennet ’m eus hiziv e forom Yann ar gemenadenn-mañ a ziskriv ur frazenn gant Xavier Grall :

“ Testamant an derv, urzh ar siprez. ”
Kevrinus e chom ar gerioù-se evidon. Met ma prederian warno ur wech an amzer…

Respontet he deus Ingivaldur :

Urzh ar siprez : Ur seurt skeudenn dennet ouzh ar vered, urzh ar siprez en ul linenn rik a-hed an hentoù.
Testamant an derv : marteze skeud ar wezenn, pe kabelloù-touseg binimus… N’eus forzh, un dra bennak trist a dalv, met brav ar skeudenn.

D’am soñj (’m eus ket lennet an destenn gant Xavier Grall, ne lâran ket), ret e vefe klask kompren an div skeudenn a-gevret. Urzh ar siprez zo ur skeudenn dennet ouzh ar vered sur a-walc’h, met ne gavan liamm ebet gant an eben skeudenn. Me a glaskfe kentoc’h ul liamm e-keñver an tuadur en egor. Ar siprez a uhela war-zu an oabl tra ma sank an derv don en douar. Ar siprez zo ur skeudenn dennet ouzh an dazont, skeudenn an esper (ha setu perak e vez kavet kement siprez er beredoù). An derv zo ur skeudenn dennet ouzh an amzer tremenet, gant gwrizioù don (ur wezenn a vev pell-tre). Testamant an derv, ul liamm gant an amzer tremenet, urzh ar siprez, ul liamm gant an dazont. Testamant an derv, a zesk ar furnez dimp ; urzh ar siprez, a c’houlenn fiziañs hag esper diganimp.

A-benn ar fin

2006-08-07T21:24:00.000+02:00

An holl dud a anavez Starmania, gant Luc Plamondon ha Michel Berger. Kanet he doa Fabienne Thibeault evit ar wech kentañ ar ganaouenn-mañ.

Kousket e vez an eil ouzh egile
Bevet e vez an eil gant egile
En em flouret, en em goulouchal e vez
En em gomprenet, en em frealzet e vez

Met a-benn ar fin
e vez meizet
ez eo an dud o-unan-penn er bed bepred

Dañset e vez an eil gant egile
redet e vez an eil war-lerc’h egile
En em gasaet, en em ziroget e vez
En em zistrujet, en em c’hoantaet e vez

Met a-benn ar fin
e vez meizet
ez eo an dud o-unan-penn er bed bepred

Melkoni o tont en-dro bepred…

Ur rimadell

2006-08-06T18:24:00.000+02:00

Ur rimadell ijinet diwar ur werz gant Paul Fort. Kavet ’m eus meur a stumm eus ar werz-mañ…

Lugerniñ a ra ar mor evel ur grogenn.
E besketa a blijfe d’an dud.
Glas eo ar mor.
Louet eo ar mor.
En oabl eo livet,
en arc’hant hag en dantelezh.

Hag ur stumm all :

Dreist ar c’harzh e lugern ar mor,
evel ur grogenn e lugern.
E besketa a blijfe d’an dud.
Drant eo an oabl, brav eo miz Mae.

C’hwek eo ar mor dreist ar c’harzh,
c’hwek eo evel un dorn d’ur bugel.
E flourañ a blijfe d’an dud.
Drant eo an oabl, brav eo miz Mae.

E daouarn lenn an aezhenn
e vev hag e lugern nadozioù
hag a wri ar mor gant ar c’harzh.
Drant eo an oabl, brav eo miz Mae.

Kinnig a ra ar mor dreist ar c’harzh
e valafenned disoursi,
bigi o vont da verdeiñ.
Drant eo an oabl, brav eo miz Mae.

Un deiz

2006-08-05T09:38:00.000+02:00

Un deiz e-touez deizioù all
e choman ganin va-unan.
Perak e chomez da-unan-penn,
da-unan-penn, o va ene ?

Un deiz e-touez deizioù all
e teuy betek ennout
ha lâro dit, o va ene,
lâro dit e kar ac’hanout.

Un deiz e-touez deizioù all
e tridi gant al levenez
oc’h anavezout an hini
en doa da garet abaoe deizioù.

Dec’h pe arc’hoazh

2006-08-04T09:07:00.000+02:00

Anavezout a rit ar ganaouenn-mañ gant Serge Gainsbourg ? Klask a ran treiñ anezhi e brezhoneg…

Selaou va c’halon o lammat
Ne lamm ket evidout
Evit unan all ez lec’h avat
ha n’anavezan ket anezhañ
Dec’h pe arc’hoazh
am bije lavaret ya dit
Dec’h pe arc’hoazh
met n’eo ket hiziv
Ya, me a c’hallje bezañ dit
ne oas ket amañ koulskoude
Dieub oan eveldout
ne ouien ket avat
Dec’h pe arc’hoazh
am bije lavaret ya dit
Dec’h pe arc’hoazh
met n’eo ket hiziv
Dec’h zo ken pell c’hoazh
ha ne garen ket ac’hanout
Ha warc’hoazh mar soñjez ennon
ne vin ket amañ ken
Dec’h pe arc’hoazh
am bije lavaret ya dit
Dec’h pe arc’hoazh
met n’eo ket hiziv

Trist eo, neketa ? Ha plijus, ne lâran ket !

Ar glav hag ar valafenn

2006-08-02T16:51:00.000+02:00

Ijinet diwar ur rimadell c'halleg (cheñchet ’m eus an istor koulskoude) :

Ar glav war ma c’herc’henn,
pegen yen ! pegen yen !
Ar glav war ma divrec’h,
oc’h adpignat d’an nec’h !
Ar glav em c’halon,
p’lec’h ’mañ ma mignon ?

Hag unan all… :

Nij, balafenn !
Balafenn, nij ! nij ! nij !
Nij en avelig jentil,
nij betek an dorgenn,
nij a-us d’ar meurvor !

Dek vloaz zo

2006-08-01T14:07:00.000+02:00

Dek vloaz zo oa bet drouklazhet eskob Oran e bro Aljeria, d’ar c’hentañ a viz Eost 1996. Pierre Claverie eo e anv. Dre eurvad am boa kejet gantañ un nebeud deizioù a-raok. Debret hor boa lein a-gevret. N’hallan ket ankouaat livson e vouezh, kuñv, resis ha leun a aotrouniezh war un dro.

Sklaer oa e vennozh : ret eo d’an Iliz derc’hel en he sav el lec’hioù a zo roget hor bed enno. E-giz ar groaz plantet e-touez tud diroget gant ar gasoni, gant ar pec’hed. Plas an Iliz e vo kavet el lec’hioù a zo ar vuhez rust enno e doare ur sin eus goanag evit ar beorien hag ar re a zo o c’houzañv.

Betek ma savo ar Werelaouen

2006-07-23T08:23:00.000+02:00

“ Suroc’h a se e teu da vezañ evidomp lavar ar brofeded, a rit mat o terc’hel dezhañ, evel ouzh ur c’houlaouenn o lugerniñ en ul lec’h teñval, betek ma paro an deiz ha ma savo ar Werelaouen en ho kalonoù. ” (Eil lizher sant Per 1, 19.)

Ur gomz kevrinus met sklaer evit hor c’halonoù : emaomp o chom en deñvalijenn hag o c’hortoz gouleier ur bed nevez. Tridal a reomp en ur glevout komzoù ar brofeded hag a zo ur bir o toullañ moger dev hon toull-bac’h. Ur c’hoant divent eus an aer nevez hag eus gouloù a verv ennomp.

Kuzhet em eñvor

2006-07-22T18:35:00.000+02:00

Gwerzioù all gant Baudelaire ’m eus kavet hiziv hag a zeskriv ur skeudenn dost eus un hunvre ’m oa graet bloavezhioù zo…

Un enezenn ziegus hag a brof an natur
gwez dreistordinal ha frouezh lipous enni ;
paotred hag a zo moan ha nerzhus o c’horfoù
ha merc’hed hag a vam eeunded o daoulagad.

Pelec’h emañ an enezenn-mañ a zo kuzhet em eñvor ? Peseurt c’hoant a sach ac’hanon etrezek enni ? Un huñvre eus peoc’h, eus leunded, eus puilhentez ? Pe un touellwel, un treuzfaltazi, ur straed-dall bennak ?

Ya !

2006-07-19T17:59:00.000+02:00

Anavezout a rit ar gazetenn sizhuniek Ya ! (© Keit vimp bev), evel-just !

Plijadur am eus bep sizhun o lenn ar pennad gant Job an Irien, war ar bajenn 4 da gustum. Ur pennad berr diwar-benn un degouezh a-bemdez, ordinal, dister. Gouzout a oar Job an Irien kavout tañva ar vuhez e darvoudoù eus bep seurt. Gouzout a oar tennañ ar mel eus un deiz ordinal en un doare gwall simpl, digamambre.
Ne ra ket skol d’e lenner. Kontañ a ra e istor war eeun. Pediñ a ra e lenner da sellout ouzh an traoù a zo war e dro gant daoulagad nevez. Hag emañ al lenner o vont en un derc’h nevez eus e vuhez e-barzh… E sell a zeu da vezañ donoc’h hag habaskoc’h.

Bennozh Doue deoc’h, Job !

Roz he deus gouelet

2006-07-09T09:10:00.000+02:00

Peder linenn hepken, pebezh burzhud, ne lâran ket !
Setu troidigezh ur varzhoneg gant Rimbaud.

Roz he deus gouelet ar steredenn e kalon da zivskouarn,
Gwenn en deus ruilhet an egor eus da chouk betek da zargreiz,
Rouz en deus pizennet ar mor ouzh da zivronn ruspin,
Ha du en deus gwadet ar gwaz diouzh da gostez meur.

Sedrez frigaset

2006-07-03T23:12:00.000+02:00

Karout a ran barzhoniezh ar Bibl, barzhoniezh ar Salmoù dreist-holl. Leun a skeudennoù imbroudus int, tennet eus ur vro start, eus bro ar gouelec’h, eus bro an dour ral hag ar sedrez uhel.

Mouezh an Aotrou a dorr ar sedrez,
an Aotrou a frigas sedrez al Liban :
Lakaat a ra al Liban da lammat evel ul leue,
hag ar Sirion evel ur bual yaouank. (Salm 28)

Perak n’int ket a bep taol hon divskouarn evit anavezout ar vouezh-mañ a zirog mogerioù hor buhez ? Gallout a ra lakaat ar re c’halloudek da gouezhañ diwar o zron hag ar re izel da uhelaat (s.o. Lukaz 1, 52). Penaos e vefe tu da chom bouzar ?

Fallgalon

2006-06-28T07:25:00.000+02:00

Ar fallgalon on krapet ganti hiziv.
Petra zo o waskañ ouzh va ene ? Poan-spered reizh pe emgarantez ziwir ? Ne gavin ket respont ebet. N’eus forzh penaos, ne vefe ket talvoudus.
Adkregiñ a ran gant red va buhez. Kempenn va gwele, distlabezañ va c’hambr, diskrivañ d’ur mignon, kendelc’her gant ul labour kroget bennak. Kendelc’her ouzh va buhez.
Fenoz ec’h adkavin va foan, ar gwask d’am c’halon.

Dre chañs e vefe bezañ un draig dic’hortoz hag a zegouezhfe em devezh. C’hoarzhadenn ur plac’hig hag a red war lerc’h he mamm. Un amezeg hag a son klarinetten en abardaez. Aloubiñ a ra ur sioulder trumm ac’hanon neuze, evel gwad nevez o redek em gwazhiennoù.

Pe netra. Frealz ebet. Bec’h ar vuhez o pouezañ war ma divskoaz.

Perak out mantret, va ene,
ha perak hirvoudiñ ?
Esper e Doue, rak e veuliñ a fell din,
eñ va salver ha va Doue ! (Salm 41)

stock.xchng

2006-06-21T18:09:00.000+02:00

Pelec’h e gavan skeudennoù ma blog ? War ul lec’hienn dispar ha digoust atavik : stock.xchng.
Ret eo en em enrollañ da gentañ. Digoust eo, evel-just ! Ha da c’houde e vo tu da glask skeudennoù eus an dibab bern-war-vern.
Pep skeudenn a zo staget gant un diskrivadenn hag a zo resisaet an enklask ganti. Gant un notenn ivez evit merkañ ar re wellañ.
Ul lodenn eus ar skeudennoù zo miret gwirioù o adskeudennadur, ul lodenn all zo dieub o gwirioù. Digoust eo ar peurvrasañ.
Mont a ran di alies en-dro…

Skeudennoù ar yezh

2006-06-20T10:06:00.000+02:00

Deskiñ a ran brezhoneg abaoe daou vloaz hepken. N’eo ket tra-walc’h evit komz flour, siwazh. Sur eo : ne soñjan ket e brezhoneg, o tistreiñ ma mennozhioù eus ar galleg emaon. Da betra e servijo neuze ? Ne dalv ket ar boan da skrivañ ur yezh distroet ! Fellout a rafe din sevel frazennoù en ur yezh wir. Me a gav din, brezhoneg zo ur yezh eus an douar. Pa vezan o soñjal e Breizh pe e Breizhiz en em gasan d’ur vro eus kouerien e Kreiz-Breizh, etre Boulvriag ha Bulad-Pestivien, da lavarout eo etre Bro Gerne ha Bro Dreger. Koadoù teñval, brumenn c’hleb, kleuzioù uhel, chapelioù maen… Setu ma doare da garout Breizh. Du-hont e vez komzet ur yezh druz evel an douar, leun a skeudennoù, fetis evel ar vuhez wirion.
Lenn a ran oberenn Anjela Duval a-benn ma vo boazet ma divskouarn tamm-ha-tamm da sonerezh he yezh.

Doue d’ho pennigo !

2006-06-17T10:35:00.000+02:00

“ Doue d’ho pennigo ! ”, pe : “ Bennozh Doue ! ” An troioù-lavar-mañ a vez implijet peurliesañ hep dave da o orin relijiel. Un doare lavar a bemdez pa vez un amezeg o paouez strevial pe evit trugarekaat anezhañ.
Dedennus int koulskoude. Tu a vefe da respont gant ur “ Mersi bras ! ” evit trugarekaat unan bennak. Se zo un doare ordinal, n’eus netra da lavarout ouzhpenn. (Bez’ eus traoù da glask evit ar ger-mañ ivez… a zo e orin koulz relijiel.)
Ma vez respontet gant ur meneg eus Doue, setu emañ unan trede o tont war leurenn an diviz e-barzh. Bremañ ez eus tri den a vez sellet anezho. N’eo ket ur jeu etre me hag an hini all ken. Ma darempred gantañ a ya dreist an eskemm bihan on kroget ennañ. Emañ Doue etrezomp bremañ. N’eus ket eskemm ebet ken. Ul lid eo bet deuet da vezañ kentoc’h. Lid hor breudeuriezh. N’eus ket unan kreñv hag unan gwan ken, n’eus ket unan siferniet hag unan yac’h-pesk ken, n’eus ket unan a zle un dra bennak d’an egile ken. Breudeur eomp bet da vezañ bremañ o vevañ e madelezhus Doue, en e vennozh.

Sonerezh an avel

2006-06-11T17:16:00.000+02:00

Perak ec’h addegas gouel ar Pantekost ar memes gwerzioù gant Baudelaire d’am soñj bepred ?

Ar sonerezh ma c’hemer alies evel ur mor !
Davit ma sterenn zisliv,
dindan ul lein brumennek pe dre un eter frank,
e lakaan da ouel ;

Dont a ra da soñj din bloavezhioù ma bugaleaj e Provañs, pa vezen o kavout ma flijadur e redadennoù a-dreuz ar c’hoad krenn. En ode Saou, e-kichen Krest, en un douar trufennus, e tigor ur boulc’h evit an hini n’eus ket aon oc’h en em ginnig d’ar mistral feuls a chervad eno. Di ez aen em follentez evit kargañ ma c’horzailhenn gant c’hwezh ar munudig hag ar tin.

Gant ma bruched war-raok ha ma skevent c’hwezhet
evel ul lien,
e krapan gant kein an tonnoù krugellet
a vouch an noz diouzhin ;

Bepred m’eus karet an avel, mignon ma rogoù e oad-krenn eo bet, an hini a fizien ennañ ma c’hevrinoù pa oan o yudal anezho a-dal dezhañ.

Santout a ran o taskrenañ ennon youloù holl
ul lestr o c’houzañv ;
an avel vadelezhus, ar barr-amzer gant e reverzhioù
a luskell ac’hanon
a-us d’an islonk divent.

Un avel bar e vefe en Doue, a c’hallfen risklañ lestr ma buhez dezhañ ? Prometiñ a ra ur chervad par, buhez a-leizh dimp ?

A-wezhioù all, kalm-gwenn, melezour bras
ma dic’hoanag.

Eur ar c’halm-gwenn, pa c’hwezh an aezhenn dister a santer a-boan, zo amzer ar feiz kentoc’h eget amzer an dic’hoanag.

Tri haiku c’hoazh

2006-06-07T10:53:00.000+02:00

Setu daou haiku nevez…

E-barzh kasenn ar stêr e tremen an amzer
a-dreuz va daouarn serret.

Ar beure-mañ e c’hwezh an avel war-du an hanternoz.
Adkemer a ran an hent d’am burev.

Hag an hini trede :

Ouzh sked al loar, he dremm morlivet.
Hag he sae ruz-flamm.

En ho koun

2006-06-02T09:37:00.000+02:00

Sarac’h ar gwez-tilh a-hed an hent,
skedoù an heol o c’hoari war-c’horre al lenn,
e koun largentez ho prezegennoù.

Teñvalijenn ar c’hoad tolzennek,
koumoul nec’hus ha gourdrouzus oc’h astenn war ar vro,
e koun ho stagadur ouzh ar groaz.

Gwrizioù don ha stank an dervenn,
hiboud didroc’h ha dalc’hus ar stêr,
e koun ho tiskenn d’an ifernioù.

Kanoù ar c’halvenniged evit tarzh-an-deiz,
redadenn ar c’honikled er parkeier,
e koun ho tasorc’hidigezh vadelezhus.

Daou haiku nevez

2006-06-01T09:27:00.000+02:00

Setu daou haiku nevez :

Un dakenn c’hlizh war un delienn.
Piv eo an hini a vag an egile ?

Ar rozenn am eus foulet
he deus dilezet he c’hwezh-vat din.

Breskezh ha madelezh a-gevret. Piv eo kreñv estreget an hini a zo brokus ? Ha penaos e vez un den brokus panevet ma ro e vuhez ? En ur vervel he deus roet ar rozenn he c’hwezh-vat…

del.icio.us

2006-05-29T12:41:00.000+02:00

Lennet ho peus marteze war du kleiz ma fajenn an titl iskis-mañ : del.icio.us. Petra eo se ?

Un dastumadeg eus sinedoù (bookmarks) eo del.icio.us. Gant del.icio.us e tastuman va sinedoù en ur geneilañ rummadoù gant pep hini. Bete-vremañ mann ebet ispisial. (N’eus ket d’ober charre gant se c’hoazh !) Met tu zo ivez da gendeuziñ va sinedoù gant sinedoù ar re all ! An holl dud a c’hall lenn hag eilskrivañ va sinedoù. Ha gallout a ran dizoleiñ sinedoù ar re all diwar ur rummad bennak. Un arnodenn a dalv !

.bzh

2006-05-28T09:20:00.000+02:00

Pevar chomlec’h ’m eus dija evit va fosteloù, gant pep seurt a astennoù : .com, .fr, .org ha .net. Met gwelloc’h e vefe ganin kaout ur chomlec’h gant .bzh ! Setu ur skrid-goulenn hag a esae cheñch an traoù :

Nevez-digoret eo an astenn .cat evit Katalonia. Gwadeloup, Gwiana, ar Martinik hag ar Reünion o deus ivez o astenn .gp, .gf, .mq ha .re dija ! Ret eo da Vreizh kaout .bzh ! Evit ma vo klevet hor mouezh gant an AFNIC hag an ICANN, a zo karget da reoliata an astennoù war ar genrouedad, sinit ar skrid-goulenn-mañ !

Anavezout a rit bzh.bz ? Gant al lec’hienn-se eo tu da sevel ur chomlec’h gant .bzh.bz evit e lod-dibenn (an astenn .bz zo astenn bro bVeliz). Da skouer tu zo da dapout va blog gant ar chomlec’h-mañ : http://red-an-dour.bzh.bz/… Dreist !

Melkoni

2006-05-26T21:26:00.000+02:00

Lennet war lec’hienn Kervarker al lavar-mañ a zo leun a velkoni :

Ur c’hae-spern a ya da dri bloaz,
Tri oad-kae, oad ki,
Tri oad ki, oad marc’h,
Tri oad marc’h, oad den,
Tri oad den, oad moualc’h beg melen,
Tri oad an den e chom ar voualc’h er c’hoad,
Nemet er goañv e vez re yen.

Mervel a ra an den pa vez ur bloaz ha pevar-ugent, neuze ! Pevar-ugent vloaz a lavar ur salm ivez :

Deizioù hor buhez dek vloaz ha tri-ugent,
evit ar re greñvañ, pevar-ugent,
ha c’hoazh o lod brasañ a zo poan ha labour,
gwall-vuan e tremenont ha kuit e tinijomp-ni.

Pa’z on bet daou-ugent vloaz eo deuet ur mennozh nevez din : ne vez ket koshaet, panevet war a seblant. Ar galon a van yaouank. Ne gosha ket. Ar c’horf en enep an hini eo a gosha. Aze emañ an dalc’h evit an den-mab : en distok etre an oad ofisiel, da lavarout eo oad ar c’horf, hag an oad diabarzh, da lavarout eo oad an ene. N’eo ket an den evel ur frouezh hag a zarevfe. C’hoarzhadenn an hini kozh zo heñvel ouzh c’hoarzhadenn an hini yaouankoc’h. Ha poan an hini yaouank zo heñvel ouzh poan an hini kozh ivez, siwazh ! An hini koshoc’h eo ret dezhañ deskiñ bevañ gant e velkoni, ne lâran ket, peogwir e wel e galon ken yaouank o sankañ tamm ha tamm dindan bouez ar bloavezhioù.

An amzer a dremen
Hag an amzer ne dremeno biken.

Pa varv un den ez a ur bugel da anaon.

Levenez

2006-05-24T15:28:00.000+02:00

Kavet ’m eus dre zegouezh ur varzhoneg gant Anjela Duval he deus addegaset va haiku kentañ d’am soñj. Hag an eil haiku ivez… Levenez eo hec’h anv. (Tu zo da gaout an holl varzhonegoù war al lec’hienn savet gant ar gevredigezh “Mignoned Anjela” © Kuzul ar Brezhoneg.) Setu bremañ ar varzhoneg ’m eus kavet :

Dont a ra hep benveg
Hep taboulin na trompilh
He c’han na sav ket re uhel
Dreist an tosennoù.
Emañ damdost dindan an dorn.
Dont a ra d’azezañ digamambre
E-kichen ar re a ro dezhi degemer.

Tost eo ouzh ur salm :

Aotrou, n’eo ket lorc’hus va c’halon ha n’eo ket balc’h va daoulagad.
Ne glaskan ket traoù re vras na re uhel diouzhin-me.

Daoust ha n’em eus ket kentoc’h plaenaet ha sioulaet va ene ?
Evel ur bugelig war vrennid e vamm, evel ur bugelig va c’halon ennon-me.

A Israel, esper en Aotrou, bremañ evel da holl viken.

An den eo ret dezhañ pleustriñ an uvelded hervez ar salm tra ma lavar Anjela eus uvelded al levenez hec’h-unan. Uvelded al levenez a c’halv an den war he lerc’h. N’eo ket ur galv da-vat, ur bedadenn kentoc’h. Ur mestr eus furnez eo al levenez neuze, kelenn a ra dimp dont da vezañ mab-den dre hentoù ur galon habask.

Haiku brezhoneg

2006-05-23T17:17:00.000+02:00

Skrivet ’m eus barzhonegoù berr e doare an “haiku” japaneg. Setu va haiku kentañ :

Gwagenn ingal ha galloudus al levenez
a ro he zalm d’am c’halon.

Hag unan all :

Emaout o chom e kanoù al labous.
Aozañ a rez un neizh dezhañ.

Drol eo an arnodenn : forsadenn ar verrentez va sikour evit kas kuit pep seurt a droioù-lavar didalvez ha dibab gant aked pezh a dalvez bezañ skrivet. N’eus ket da gerc’hat gerioù luziet. Ret eo klask ar skeudenn resis a bedo al lennerien da vont enni. Ha da veajiñ ganin e tachennoù va faltazi.